Gestig 1908

Slegs die notules van 1954 tot 1982 kon opgespoor word, daarom is die meeste uittreksels uit daardie era. 

1931- Die Gemsbokkop as klubwapen word op 24 Februarie 1931 as klubwapen aanvaar. 

Herklaas Engelbrecht snr het die huidige Eiland Rugbyveld ontbos en gesleep met donkies en plankskrapers, gras is geplant met behulp van skoolseuns.

1937 - Keimoes Rugbyklub toegelaat moet word om bekerwedstryde te speel mits die volgende rowwe spelers nie mag speel nie, naamlik Botha, Payne en Roux. 

1937 - Dat  £ 1-5-0 aan Buchuberg gestuur word synde helfte van die hekgeld te wees. 

1939 - Die koste van kleurbaadjie en wapen sal  £ 3-15-0 wees en mnr Wilkinson stel voor dat die voorsitter, Daantjie Josling, 30 jaart materiaal moet bestel om baadjies mee te laat maak.

1940 - Kotie Kotze bied aan om die orkes te betaal, daar word besluit dat kaartjies 5 sjieling dubbel en 3 sjieling enkel sal wees.

1954 - Die klub doen vir die eerste keer aansoek vir ‘n permanente dranklisensie. 

1954 - Jaarvergadering, Before closing the chairman extended the club’s congratulations to Franco Schultz on playing for Griquas during the 1953 season and also being selected to play in the S.A Rugby Trails at Potchefstroom in the North vs North game. 

1954 - Met die bepaling of ‘n lid kwalifiseer as ‘n “Country Member” het reël 13 van die konstitusie as volg gelees, that when dealing with the words “within 5 miles of the Municipal Boundaries of Upington” these words be interpreted as “ within 5 miles by a public proclaimed road”.

1954 - Bellon Bros. bied die klub £ 20 per seisoen aan vir die alleenreg om roomys te mag verkoop tydens wedstryde. 

1954 - Die bestuur besluit om ‘n rolbalbaan aan te lê. 

1954 - Die aansluitfooi vir spelende lede word vasgestel op 5 sjieling en die van ander lede op £ 3 . 

1954 - N.S Basson en sy helpers het R 14 000 ingesamel as gedeeltelike betaling van die huidige paviljoen. 

1954 - Die inwyding van die paviljoen by die Eiland het plaasgevind op 12 Junie 1954, 300 pare is verwag vir die dans die aand. Die argitek vir die paviljoen was mnr George Albert.

1954 - Met die inwyding van die paviljoen is die Springbok Hennie Muller genader om die opening waar te neem en toe hy nie kon nie is Frank Mellish voorgestel.

1954 - Die paviljoen het bekend gestaan as die Harold Holmes Paviljoen. 

1954 - Met die bedanking van Kat van Blerk word Schalk vd Merwe gekies as vise-kaptein van die eerstespan. 

1954 - Daar was ‘n Kanoneiland Rugby Netbalklub sowel as Augrabies Voetbalklub. 

1954 - Met inagneming van die Jode vakansiedae, asook ‘n geskikte datum vir die publiek, is besluit om die jaarlikse rugbydans op 2 Oktober 1954 te hou. 

1954 - Harold Holmes en Abe Hummel word afgevaardig om met Upington Tennisklub te onderhandel vir die samesmelting van die twee klubs, die voorstel is algemeen aanvaar deur beide klubs en samesmelting het plaasgevind, die tennisklub bestuurslede teenwoordig was mev J Holmes, mev W Coetzer, mnr W Hummel, mnr de Waal en mnr G Carr. 

1955 - Die bestuur reël vir ‘n oortrokke fasiliteit van £ 200 by Standard Bank op die klub se  lopende rekening. 

1955 - The President showed the committee a sample of the new proposed club tie, which have red as a background with gemsbokheads.

1955 - Na die klub se aansoek om ‘n dranklisensie afgekeur is het die komitee besluit dat lede wat aan die NG Kerk behoort, hul saak moet stel by hul dominee.

1955 - Daar word besluit dat stigterslede 20 gienies moet stort en dat dit sal dien as subskripsie vir 10 jaar.

Distriks stigterslede(country members) se subskripsie sal nooit meer as die helfte van ‘n dorpstigterslid ( town member) se subskripsie beloop nie.

1956 - Daar word besluit om ‘n kennisgewingbord aan te bring in Schröderstraat waarop kennis gegee sal word  van wedstryde.

1956 - Die klub ontvang £ 27 van die Moths sodat die orkes van die Scottish Highlanders op die rugbyveld kan verskyn voor ‘n klubwedstryd.

1957 - Daar word besluit om as ‘n teken van erkentlikheid £ 5.5 aan mev Herklaas Engelbrecht snr te skenk vir dienste gelewer in die kafee.

1957 - Upington Jukskei-laer doen aansoek om aan te  sluit by Upington Rugbyklub. 

1957 - Daar word besluit dat intreefooie te staan bly op 5 sjieling. 

1961 - ‘n Karakoelram is geskenk deur mnr Jim Schamly om fondse in te samel vir betaling van spreiligte, die ram lewer die mooi bedrag van R 405 op.

1962 - Die spreiligte word in gebruik geneem en het R1 900 gekos. 

1962 - Die sekretaris deel die vergadering mee dat die polisie ‘n vertoning van stamdanse deur naturelle van Ammosal op die rugbyveld goedkeur, maar dat die munisipaliteit toestemming weier. Hy noem ook dat mnr Harris van die myn sê dat die naturelle kosteloos sal optree en dat die klub hul net van vleis kan voorsien as die klub dit so sou verkies. 

1962 - Die komitee besluit dat 3 dosyn bier deur die klub verskaf sal word met wedstryde teen besoekende spanne maar dat die klubspelers ‘n gelyke deel moet bydra en dat dit in die klubkamer geniet moet word. 

1962 - Om klubgees te bevorder is besluit dat die klub R 10 sal gee vir ‘n geselligheid wat in die klubkamer gereël moet word maar dat minstens 20 spelende lede teenwoordig moet wees. 

1963 - Die sekretaris deel die vergadering mee dat onderhandel word met Pieter van der Byl (Piet Pompies) om ‘n reeks konserte te kom gee op 2,3 en 4 Mei, John Longland wys die vergadering daarop dat dit ‘n nagmaal naweek is en hulle teenkanting van die kerk kan verwag, daar word besluit om die konserte op ‘n ander datum te reël.  

1963 - Franco Schultz word geluk gewens met sy verkiesing as speler vir die Markötters. 

1963 - Die bestuur besluit om ‘n rekening aan mnr S Hayworth te stuur vir die huur van die veld vir ‘n vergadering van die Verenigde Party.

1965 - Spoorweg Rugbyklub wy hul rugbyveld en paviljoen in op 24 April 1965. 

1965 - Upington Rugbyklub doen ‘n skenking van R 22 aan Gordonia Hospitaal wat met ‘n “Old Croc” wedstryd ingesamel is.

1965 - Op die jaarvergadering doen die president mnr Jack Horn die volgende bedankings:

            Aan: Mnr Frikkie Truter vir die verlenging van die doelpale.

                      Mnre Upington Boubenodighede vir verf

                      Hoërskool Upington vir gebruik van hul grassnyer

                       Munisipaliteit vir geduld met die klub met betaling van lening.

1965 - Die klub omskep ‘n verlies van R 286 in 1964 na ‘n wins van R 923.

1966 - Die orkes van Nico Carstens word gereël vir die jaarlikse dinee van die klub vir R 200.

1966 - Daar word besluit dat elke toerlid R 10 moet betaal om te gaan toer na die Boland en WP, behalwe spelers wat hul motors beskikbaar stel, dit word benadruk dat geld wat oor is na die toer in die klub se rekening gestort moet word. 

1966 - Daar word besluit om ‘n komitee saam te stel om gesellighede te reël vir klublede, mnr Mocke stel egter voor dat die persoon wat kaartjies by die deur neem daar moet bly tot ‘n halfuur na die fliek uitgekom het om ongewenste elemente uit te hou. 

1966 - Na ‘n aansoek deur die klub om ‘n Noordwes Kaap wedstryd op die Eiland aan te bied ontvang die klub ‘n brief met onder andere die volgende paragraaf, “Inspeksie het aan die lig gebring dat die paviljoen van u klub nie behoorlik gemerk is nie. Sommige sitplekke is slegs 12 duim uitmekaar gemerk en andere weer tot 24 duim. My komitee verlang dat u paviljoen oor gemerk word en dat elke sitplek 20 duim moet wees. Voorsiening moet gemaak word vir ten minste 2000 sitplekke vir besprekingsdoeleindes. 

1966 - Die klub oorweeg dit sterk om van die Eiland te trek na die skougronde, daar kon egter nie genoeg steun op die vergadering vir so ‘n besluit gekry word nie. 

1966 - Na afloop van ‘n toer na Loeriesfontein word verslag gedoen dat Dawid Hyman twee bande verloor het op sy motor, die bestuur besluit om hom R 10 per band te vergoed. 

1967 - Dineekaartjies vir die klub se dinee het R 1,50 beloop, Oranje Hotel het die etes voorsien teen 95c per kop.

1969 - Die klub besluit om die klubwapen te laat registreer, koste sou R 115 beloop. 

1967 - Hoteltariewe uitgevind vir ‘n besoekende span van Windhoek, Oranje Hotel - R 4.10 kamer sonder bad

R 6.00 kamer met bad, Gordonia Hotel R 4.10 kamer sonder bad.

1967 - Met ‘n besoek van ‘n span van die Potchefstroomse Universiteit is ‘n brief vooraf ontvang met onder ander die volgende paragraaf,  “Geen dansparty/e van watter aard ookal mag deur ‘n toer - of P.U.- verteenwoordigende groep of lid bygewoon word nie. 

1968 - Voor ‘n besoek van ‘n Matie toerspan ontvang die klub ‘n brief wat onder andere sê dat dit die klub vry staan om ‘n geselligheid of dans te hou vir die besoekende studente en dat hul graag bier en wyn sal geniet indien die klub dit sou wil aanbied, maar dat die studente nie toegelaat word om sterkdrank soos brandewyn, whisky of jenewer te gebruik nie. 

1968 - Op die jaarvergadering word besluit dat die kleurbaadjie moet verander na blou in plaas van gestreep. 

1969 - Op ‘n spesiale algemene vergadering gehou 18 Maart word ‘n veranderde konstitusie aanvaar, hier is ‘n paar uittreksels.

      Reël 1: Die naam van die klub sal “Upington Rugby - voetbalklub” wees.

      Reël 2: Die kleure van die klub sal as volg wees: Donkerblou truie met wit krae, wit broeke en donkerblou kouse met donkerrooi omslae. Die kleurbaadjie sal donkerblou wees. Die klubwapen sal bestaan uit ‘n gemsbokkop wat in profiel en natuurlike kleure op ‘n donkerblou agtergrond aangebring is met die letters U.R.F.C. onderaan. 

1969 - Daar word besluit om ‘n stoepverkoping te hou om fondse in te samel, Peter Head stel voor dat groenmielies te koop aangebied moet word. 

1969 - Die sekretaris, Ben van den Heever, bedank per brief mev Jankielsohn vir die sukses wat sy gemaak het van die klub se stoepverkoping, hy vra haar ook om die dank van die klub oor te dra aan Chummy “vir sy aandeel in die broodsnyery”. Hy noem ook dat Upington Rugbyklub baie arm sou gewees het in die sin van klubgees, samewerking en finansies sonder die Jankielsohn’s. As naskrif skryf hy as volg,  “Ek bied my verskoning aan dat ek die brief nou eers tik, maar ongelukkig was ek lank in die bed met die Hong Kong griep”.

1969 - Chummy Jankielsohn stel op ‘n bestuursvergadering voor dat films van toetsrugby verkry moet word en aan spelers vertoon moet word.

1969 - Op die jaarvergadering word besluit om ledegeld te verhoog van R 3 na R 5 per jaar, op voorstel van Peter Head.

1969 - Die huur van die Eiland word vooruit betaal vir 25 jaar teen 10c per jaar. 

1969 - In ‘n brief van Bethlehem Rugby Club oor ‘n voorgenome toer deur Upington Rugbyklub die volgende uittreksel, “Ons sal u ‘n gedeelte van die hekopbrengs gee wat nie minder as R 10 sal beloop nie, indien ‘n goeie hek maak ons dit meer.”

1970 - Daar word voorgestel dat biltong ter waarde van R 10 aan D. Hopwood geskenk  word, tesame met ‘n bedankingsbrief vir kaste deur hulle geskenk.

1970 - Die kwotasie vir die kroegtoonbank met ingeboude koelkaste soos opgerig in die ou kroeg, was vir R 208.60 en is verskaf deur Lampies & Nix Elektries.

1970 - Indien instansies die klubfasiliteite wil huur word die huur op R 11 vasgestel. 

1970 - Met ‘n wedstryd aangebied op die Eiland tussen Dorp, Senekal, Oostelikes en Beaufort Wes moes die hekgeld met Oostelikes gedeel word. Die uiteensetting aan hulle het as volg gelees;  Opbrengs hek       R 109.50

  Min kostes:

                 Vleis + wors   130 lb. @  28c/lb.           36.40

                  Papierborde                                           1.80

                  Brood                                                     2.73

                  Lone                                                       3.00

                  Ligte                                                       5.00         48.93

  Netto Opbrengs                                                                     60.57

  Helfte van opbrengs            R 30.28

1971 - Na ‘n brand in die heining om die veld asook in die palmlaning maak die klub beswaar per brief oor ‘n rekening van die munisipaliteit vir brandbestryding, soos volg.  “Die brand in ons heining is deur ons self geblus en die brandweer het hulle hoofsaaklik toegespits op die twee palmbome. Weens ontoereikende hoeveelheid water wat die wa hou, moes hulle kort-kort dorp toe ry en die drie persone wat blykbaar op diens was, was onnodig omdat daar net werk was wat een persoon met gemak kon hanteer. 

1972 - Op die jaarvergadering word Herklaas Engelbrecht jnr en Bert Young gelukgewens met hul uitnodiging na die S.A rugbyproewe. 

1972 - Oranje Unie laat weet per brief dat die klub weens stygende koste sy hekgeld van 30c na 40c mag verhoog. 

1973 - Herklaas Engelbrecht word op die jaarvergadering geluk gewens met sy verkiesing vir ‘n Rhödesiese Uitnodigingspan. 

1973 - Na ‘n wedstryd teen Kenhardt doen die spanbestuurder, Oosie Oosthuizen, verslag aan die bestuur dat twee spelers nie teenwoordig was toe die spanne vertrek het nie en die betrokke twee spelers in ‘n “uiters beskonke” toestand in die Kenhardt Hotel aangetref is, beide spelers, Nico Louw en Frans vd Merwe,  is uit die klub geskors. 

1973 - Tien van Dorp se spelers verteenwoordig Noordwes Kaap. 

1973 - Ledegeld verhoog van R 5 na R 6. 

1974 - Elf van Dorp se spelers verteenwoordig Noordwes Kaap. 

1974 - Herklaas Engelbrecht verklaar hom bereid om die rugbyveld te herstel na die vloed, teen 10c per perdekrag uur en dat die totale koste nie R 600 sal oorskry nie. Spelers sal self die paviljoen skoonmaak en verf, asook help om gras te hervestig. 

1974 - Die volgende aantal lede het aan die onderskeie klubs op die Eiland behoort:

     Rugby         -              60

     Krieket        -              25

     Rolbal         -              30

     Tennis         -              40

1974 - Herklaas Engelbrecht jnr deel die bestuur mee dat hy nie weer in 1975 beskikbaar is as kaptein nie. 

1974 - Upington Munisipaliteit deel die klub mee dat hulle nie weer bereid is om die Eiland Rugbyveld aan die klub te verhuur nie, hulle verklaar hul bereid om iets soortgelyks in ruil aan te bied om die klub in dieselfde posisie te plaas as wat hulle was. 

1974 - Die sekretaris ontvang opdrag van die bestuur om R 122, wat ge-in is by die hek tydens ‘n wedstryd teen Ammosal, oor te betaal aan die Benede Oranjerivier Noodlenigingsfonds wat hulp aan mense verleen na die vloed.   

 1974 - Daar word besluit om kraaglose V-nek truie aan te skaf om in te speel en dat die rooi omslag van die kouse vervang sal word  met twee dun eweredige wit strepe op ‘n blou omslag. 

1974 - Daar word besluit om nie meer ‘n kaas en wynaand aan te bied nie weens die feit dat daar nie genoeg kaas verkry kan word nie.

1974 - Die voorsitter wens Piet Karsten geluk met die eer wat hom te beurt geval het om deel te neem aan die Gaselle proewe. 

1974 - Oranje Unie skenk R 50 aan Dorp vir herstel van hul veld na die vloed. 

1974 - Die rugbyklub bedank mnre Herklaas Engelbrecht, Piet Karsten en Jan van Schalkwyk vir die herstel van die veld na die vloed. 

1974 - R30 word aan Burt van der Westhuizen betaal vir sy reiskostes vanaf Boegoeberg vir die hele seisoen. 

1974 - Op ‘n spesiale algemene vergadering word besluit om die klub se naam te verander na Upington Rugbyklub, dit sal ook die nuwe benaming onder die gemsbokkop op die klubwapen wees. 

1975 - Paul Barnard noem op die jaarvergadering dat dit ‘n groot verlies vir die klub is om ‘n man soos Chummy Jankielsohn wat 21 jaar lid was van Dorp te verloor, waar hy nou verhuis na Stellenbosch. 

1975 - H van Staden skenk tien spotprente om in die klub se kroeg op te hang. 

1975 - John Longland verklaar hom bereid om R 500 aan die klub rentevry te leen. 

1975 - Die bestuur besluit om op naburige dorpe rolprente te vertoon met rugby toetse as voorprente, ter insameling van fondse. 

1975 - Piet Karsten neem by Herklaas Engelbrecht oor as kaptein van die eerstespan. 

1975 - Daar word besluit dat die klub voortaan met die bus van mnr N. Bezuidenhout na alle wedstryde buite Upington sal reis en dat hy 50c per myl vergoed sal word. 

1975 - Die klub laat omhein die rugbyveld en paviljoen op eie koste. 

1975 - In sy toerverslag na afloop van ‘n toer na Oos-Londen doen Franco Schultz ‘n beroep op die bestuur dat die klub sy eie bus moet aanskaf.

1975 - In ‘n brief aan die klub deur Cambridge Rugby Football Club word die volgende verblyfreëlings bevestig by die Hotel Osner in Oos-Londen, “we confirm that the accommodation booked on your behalf comprises seven suites, each consisting of a main bedroom with two beds, a secondary bedroom with bunk beds suitable for adults, a kitchen and a bathroom. These units are priced at R 14.50 per day. Breakfast is offered at a fixed sum of R 1.50 per head and lunch varies from 60c to R 1.40. 

1976 - Kwotasie word verkry vir nuwe spreiligte en staalmaste, die maste sou R 4 500 kos en die ligte plus ondergrondse kabel ‘n verdere R 1 500, die bestuur besluit dat dit te duur is en dat die klub maar sal hou by sy ou ligte. 

1976 - Die klub hou ‘n besigtigingstoer na die nuwe aanloopbaan by die lughawe met ‘n skemerkelkie daarna, dit kos R 3 per kop en die klub maak ‘n wins van R 350. 

1977 - Tydens ‘n spesiale algemene vergadering verklaar Upington Rugbyklub hom bereid om “gemengde wedstryde”(wedstryde teen kleurlingklubs) te speel, mits die komitee spelers 14 dae voor so ‘n wedstryd kennis gee dat so ‘n wedstryd gereël is. 

1977 - Upington Hokkieklub doen aansoek om by die klub aan te sluit. 

1977 - Die eerste warmwatereenheid word geinstalleer in die storte, dit is geskenk deur mnr Human. 

1977 - John Longland verwys in sy voorsittersverslag na die toer in die Boland en sê dat baie goeie rugby gespeel is, veral teen Mosselbaai en hy skryf dit toe aan die min drank wat deurgans verbruik is. 

1977- Dorp wen beide die eerste en tweede liga, die tweedespan verloor nie een wedstryd nie.   

1978 - Op aandrang van Herklaas Engelbrecht jnr word ‘n vergadering belê om ‘n moontlike toer na Italië te bespreek, so ‘n toer word in beginsel aanvaar. 

1979 - Dantes Liebenberg word op die jaarvergadering gelukgewens met sy insluiting in die S.A Platteland span. 

1980 - Lewenslange lidmaatskap word aan Alex Joubert toegeken vir geriewe en dienste aan die klub gelewer. 

1980 - Dantes Liebenberg bou ‘n kalkmasjien vir die klub waarmee lyne gekalk kan word. 

1980 - ‘n Voorstel van mev Debbie de Wet aangaande voorgestelde verandering aan die klubwapen word voorlopig aanvaar. ( Byvoeging van rugbybal onder die gemsbokkop) Allan Marais sal die ontwerp in ink voorberei sodat dit aan die Staats Heraldikus gestuur kan word. 

1981 - Upington Rugbyklub koop R 3 000 se Bonusobligasies met vaste depositos wat losgekom het. 

1981 - 16 Rugbytruie word aangekoop by Gazelle Sports ten bedrae van R 325. Skenkings vir betaling daarvan word ontvang van Roelf Beukes - R 100, Piet Karsten - R 100, Dantes Liebenberg - R 100 en Herklaas Engelbrecht - R 25. 

1981 - Klub 100 word gestig en dien as ondersteunersklub vir Upington Rugbyklub, hul hoofdoel is om deur middel van funksies en gesellighede fondse in te samel vir die rugbyklub. 

1981 - Die klubwapen word amptelik geregistreer. 

1981 - Die voorsitter, John Longland deel die vergadering mee dat hy beoog om te bedank as voorsitter. Die besluit spruit voort op voorstel van sy geneesheer, Dr Barnard, aangesien hy rugby te ernstig opneem en dit nadelig is vir sy gesondheid. (Op die volgende vergadering het hy sy besluit teruggetrek.) 

1981 - ‘n Kort toer na De Aar word gereël waartydens spelers hul vrouens en kinders kan saamneem. 

1982 - ‘n Komitee word saamgestel ten einde reëlings te tref aangaande die 75 - jarige bestaan van die klub, die komitee bestaan uit F Schultz, C Keun en J Longland. 

1982 - Mnr Newell Terry verklaar hom bereid om R 1 000 te skenk, maar dat daar iets mee gekoop moet word wat ‘n aanwins vir die klub is, daar word besluit om ‘n bandspeler te koop, die besluit word egter later herroep en ‘n ysmasjien word aangeskaf. 

1988 - Terwyl die Eiland Rugbyveld herstel is na die vloed het die klub saans op die velde van Hoërskool Upington en 8 SAI geoefen, die kroegman het elke aand ‘n koelhouer saam gevat sodat die manne darem ‘n lafenissie na afloop van die oefening kon geniet. 

1988 - Die ou kroeg in die klubhuis word vergroot tot sy huidige vorm, dit is hoofsaaklik gedoen met geld wat deur versekering uitbetaal is vir vloedskade. 

1990 - Upington Rugbyklub kry na jare se gesukkel ‘n permanente dranklisensie, die koste daaraan beloop R 6 000. 

1990 - Toe die klub die gras wat hulle op eie koste hervestig het na die vloed, aan ‘n plaaslike tuindienste maatskappy,  wat dit op ‘n spesiale manier sou afsny en die veld weer herstel, wou verkoop om fondse te-in gedurende die afseisoen, is hulle deur die Munisipaliteit se prokureurs gestop as sou dit beskadiging van munisipale eiendom wees. 

1996 - Met die ontbinding van Noordwes Kaap Rugbyunie is alle fondse en beleggings in hulle naam, oorbetaal aan Griekwaland Wes Rugbyunie. Die klubs het niks ontvang nie. 

1998 - Na jarelange toutrekkery tussen die rugbyklub en Upington Munisipaliteit oor die verskuiwing van die klub na ander velde, is daar nou gevorder tot ‘n ooreenkoms dat die klub nog mag aanbly op die Eiland, maar dat daar elke jaar van vooraf aansoek gedoen moet word om die volgende jaar op die Eiland te mag aanbly.

Email ons deur   te click